Бројот на жртвите во Краков се зголеми на шест; напаѓачот е 25-годишен Полјак

Бројот на загинатите во нападот во Краков се зголеми на шест, а повредени се 15 лица, од кои 12 се во тешка состојба, објавија полските медиуми. Меѓу повредените има и двајца полицајци.

Полскиот премиер Доналд Туск најави дека ќе го посети градот.

Инаку, напаѓачот со автомобил влегол на Главниот плоштад во Краков и почнал со долгоцевно оружје да пука кон случајните минувачи. Тој бил ранет во судир со полицијата и е пренесен во болница.

Напаѓачот од Краков е 25-годишен полски државјанин, објави полскиот информативен портал „Онет“, повикувајќи се на портпаролката на полицијата во Краков, Катажина Число.

Напаѓачот бил облечен во воена облека и немал документи за идентификација со себе, но полицијата успеала оперативно да го утврди неговиот идентитет. Во неговиот автомобил биле пронајдени дополнителни оружје и муниција.

Полицијата ги демантираше тврдењата дека во нападот учествувало и второ лице. Претходно вечерва, помладиот наредник Јакуб Мирочна од полицијата во Краков за Полската новинска агенција (ПАП) изјави дека, според првичните информации, нападот на Главниот плоштад го извршиле две лица.