Калифорнија и шест други сојузни држави го тужат Трамп за задржување на федерални средства

Калифорнија и шест други сојузни американски држави денеска поднесоа тужба против администрацијата на претседателот Доналд Трамп обвинувајќи ја за задржување на средства одобрени од Конгресот, вклучувајќи околу 810 милиони долари што Белата куќа се обиде да ги поништи пред крајот на фискалната година.

Трамп минатата недела се обиде унилатерално да ги задржи средствата одобрени од Конгресот за трошење средства за имиграција, расни прашања и образование.

Тужбата претставува нов правен спор за ограничувањата на претседателските овластувања кога станува збор за трошење јавни пари.

Потегот на Трамп да побара од Конгресот да ги задржи средствата токму пред самиот крај на фискалната година, за законодавците да немаат доволно време да дејствуваат, предизвика критики од двете партии, а критичарите го опишаа како обид да се заобиколи уставната надлежност на Конгресот врз федералните трошоци.

Тужбата, поднесена во окружен суд во Калифорнија, предводена од главниот обвинител на Калифорнија, Роб Бонта, тврди дека одбивањето на администрацијата да ги троши наменските пари ја крши поделбата на властите и другите одредби од уставот.

„Продолжувам да се згрозувам од очигледното непочитување на претседателот Трамп на основната уставна рамка на нашата влада. Само затоа што на претседателот не му се допаѓа некоја програма, тоа не значи дека може да го намали финансирањето за неа“, рече Бонта во соопштението.

Уставот му дава на Конгресот овластување да троши јавни средства, но Белата куќа минатата недела изјави дека програмите финансирани од нив поттикнуваат нелегална имиграција, расни тензии и непотребни стравови за животната средина.

Федералните држави тврдат во својата тужба дека напорите на администрацијата на Трамп да ги задржи федералните средства ги поткопуваат ексклузивните права на Конгресот да управува со федералниот буџет.

Белата куќа засега не излезе со коментар, пишуваат британските медиуми.