Американски и литвански служби го предупредиле Каспаров дека животот му е во опасност

Поранешниот светски шампион во шах и руски дисидент Гари Каспаров изјави дека безбедносни служби на САД и Литванија го предупредиле дека животот му е во опасност, откако американските власти во септември објавија дека се уапсени поединци кои планирале атентати врз руската опозиција.

Американските власти во септември соопштија дека поднеле обвиненија против пет лица за наводно планирани атентати врз двајца припадници на руската опозиција, сместени во САД и Литванија, откако биле уапсени при регрутирање платеници за надзор на дисидентите.

Медиумите шпекулираат дека потенцијални цели би можеле да бидат Каспаров, шахистот со адреса во Њујорк, Илја Пономарев, дисидент кој живее во Украина, но редовно патува во САД, и Иван Тјутрин, опозициски активист кој престојува во Литванија.

Каспаров, кој има и хрватски пасош, во објава на платформата „Сабстак“ (Substack) напиша дека нему и на Тјутрин не им било експлицитно кажано дека се мети.

„Сепак, безбедносните служби во Литванија и САД нè предупредија дека животите ни се во опасност и дека треба да преземеме мерки на претпазливост“, напиша 63-годишниот поранешен шампион.

„Сепак, јас нема да запрам и нема да се кријам … Ќе продолжам да правам сè што можам за да го обединам слободниот свет против убиствената диктатура на Путин“, додаде Каспаров, кого Русија го стави на своите листи на „странски агенти“ и „терористи и екстремисти“.

Кремљ минатиот месец соопшти дека не гледа причина за коментирање на американските наводи бидејќи им недостасуваат веродостојни докази и факти. Русија претходно ги демантираше сите обвинувања за спроведување такви заговори на странска територија, вклучително и во САД.