Општина Кисела Вода и ЈП „Лајка“ органзиираат голем настан во пресрет на Светскиот ден на животните

Под мотото „Не можат да зборуваат, но можат да сакаат“, Општина Кисела Вода и Јавното претпријатие за благосостојба на животни скитници „Лајка“ – Скопје во сабота, на 3 октомври, организираат настан по повод Светскиот ден на животните.

Настанот ќе се одржи во паркот „Македонија“, пред Домот на култура „Билјана Беличанец“, а поканети се сите сопственици и љубители на животни.

Како што информира Општина Кисела Вода, дневната програма почнува во 11:00 часот, а просторот во паркот ќе претставува интерактивна зона за посетителите и милениците. Присутните ќе можат да добијат стручни совети од ветеринарен лекар за здравствената грижа и исхраната, додека професионални грумери ќе одржат практични демонстрации, консултации и шишање на кучиња.

Во рамки на настанот се предвидени и содржини од пет-шопови, презентации на храна и реквизити. Исто така, сите заинтересирани граѓани ќе имаат можност на лице место да вдомат бездомни кучиња од стационарот на „Лајка“.  

Продолжението на програмата следува во вечерните часови, со почеток во 19:00 часот, на истата локација пред киното „Киноверзум“ каде ќе се одржи проекција на отворено на филмот „Приказната за Силјан“, настан на кој граѓаните можат да присуствуваат во друштво на своите миленичиња.