ЕУ предложи план од пет точки за зајакнување на безбедноста на надворешните граници од мигрантски бранови

Европската комисија денеска предложи план од пет точки за спречување, предвидување и реагирање на ненадејни, масовни пристигнувања на мигранти со цел зајакнување на отпорноста и безбедноста на надворешните граници на ЕУ.

Иако нелегалните преминувања на мигранти на границите на ЕУ се на најниско ниво од 2021 година, неодамнешните настани во Сеута, кои покажаа како ненадејните пристигнувања можат да предизвикаат криза, ги ставија границите на ЕУ на тест и покажаа, како што претходно овој месец рече шефицата на Комисијата, Урсула фон дер Лајен, во нејзиниот говор за состојбата на Унијата, дека алатките за заштита на надворешните граници мора да еволуираат.

Потпретседателката на Комисијата за технолошки суверенитет, безбедност и демократија, Хена Виркунен, рече дека посилна Европа започнува со посилни надворешни граници.

„ЕУ, користејќи дигитални алатки, подобра размена на податоци и паметна технологија, ги поддржува граничните власти на земјите-членки поефикасно да управуваат со границите, да се борат против прекуграничниот криминал и да ја обезбедат безбедноста на надворешните граници на Унијата“, рече Виркунен.

Комисијата соопшти дека како одговор на настаните во Сеута, Фон дер Лајен идентификувала пет клучни области каде што ЕУ треба да дејствува, со клучни мерки за различни актери, проширување на алатките и рамките и создавање нови по потреба.

Првата точка од планот се однесува на подобрување на соработката со земјите-партнери за спречување на нелегалната миграција, каде што приоритетите се решавање на причините за нелегалната миграција, посилно управување со кризи во нови и постојни партнерства, поблиска соработка со Фронтекс, Европол и Евроџаст, како и развој на европскиот систем за контрола на границите.

Следната точка се однесува на зајакнувањето на надворешните граници на ЕУ и подразбира поддршка за откривање и одговор на идните вонредни ситуации и кризи, а третата се однесува на подобрување на системите за следење, свесност за ситуацијата и рано предупредување.

Четвртата точка од планот вклучува разбивање на мрежите за шверц на мигранти и трговија со луѓе, а петтата се однесува на зајакнување на брзото враќање на нерегуларните мигранти, вклучително и преку подобрување на соработката со трети земји во реадмисијата и поголема улога на Фронтекс во враќањето на граѓани од трети земји кои немаат право да останат во ЕУ.

Еврокомесарот за миграција, Магнус Брунер, изјави дека ЕУ ќе ги зајакне темелите што се потпираат на силни надворешни граници, ефикасна миграциска дипломатија, Пактот за миграција и азил и кредибилен процес на враќање на мигранти преку зајакнување на Фронтекс, предлагање нова европска рамка за одговор на кризи и продлабочување на партнерствата со земјите на потекло и транзит.

Планот од пет точки ќе им биде презентиран на членовите на ЕУ на Советот за правда и внатрешни работи на 1 и 2 октомври.