Белингем втора година по ред најдобар англиски фудбалер

Џуд Белингем е прогласен за фудбалер на годината во Англија втора сезона по ред, откако имаше забележителен настап на Светското првенство ова лето на кое постигна рекордни седум голови, објави денеска англиската Фудбалска асоцијација (ФА).
Ефектот што 23-годишниот играч од средниот ред на Реал Мадрид го имаше на мундијалскиот турнир претставува англиски рекорд, а националниот тим предводен од селекторот Томас Тухел го постигна својот најдобар пласман од 1966 година, завршувајќи на третото место.
„Се чувствувам одлично. Голема чест е повторно да бидам признат од навивачите. Не размислувате за тоа кога играте за вашата земја, но тоа е секако убав додаток на одличното лето што го имавме и честа да играте за националниот тим“, рече Белингем.
Два од седумте мундијалски голови, Белингем ги постигна во осминафиналната победа над Мексико, а беше двоен стрелец и во победата над Норвешка во четвртфиналето во Мајами.