Рекордните цени на горивата би можеле да ја турнат германската инфлација над три проценти

Рекордните цени на горивата предизвикани од војната во Иран би можеле да ја турнат годишната инфлација во Германија над три проценти во септември, што е највисоко ниво од крајот на 2023 година, според податоците што треба да бидат објавени денеска.

Сојузниот завод за статистика во август го утврди годишното ниво на инфлација на 2,9 проценти. Потрошувачките цени во Германија последен пат пораснале поостро во декември 2023 година, кога стапката изнесуваше 3,7 отсто.

Загриженоста околу снабдувањето со нафта повторно исплива на површина во септември, во услови на тековниот конфликт во Иран и напредувањето на милицијата Хути во Јемен во близина на протокот Баб ел-Мандеб, пренесе ДПА. Цената на суровата нафта „Брент“ привремено се искачи значително над 100 долари за барел, додека цените на бензинот и дизелот достигнаа рекордни нивоа на бензинските пумпи во Германија.

Германската влада сега планира да им обезбеди дополнително олеснување на возачите. Од 1 октомври до крајот на годината ќе стапи во сила ново намалување на данокот на горивата, со што даноците за гориво ќе се намалат за околу 0,17 евра по литар.

Се очекува ова да ја ублажи инфлацијата до крајот на годината, како што беше случај и со претходното намалување на данокот на горивата во мај и јуни.

Сепак, на среден рок, се очекува инфлацијата во Германија да остане на покачено ниво. Водечките економски истражувачки институти очекуваат инфлацијата да порасне од 2,8 оваа година на 3,2 проценти во 2027 година.

Сојузниот завод за статистика на Германија денеска треба да ги објави новите податоци за инфлацијата.