Тиса не го поддржува Сијарто за потпретседател на унгарскиот парламент, ќе чека нов кандидат од Фидес

Партијата Тиса објави дека нема да го поддржи шефот на унгарската дипломатија Петар Сијарто за позицијата заменик-претседател на парламентот наведувајќи дека очекува нов кандидат од владејачката партија Фидес.

Лидерот на партијата Тиса, која победи на неодамнешните парламентарни избори, Петер Маѓар, на социјалните мрежи изјави дека партијата останува на ставот дека секоја парламентарна група треба да има свој заменик-претседател на парламентот, но дека сегашниот предлог на Фидес за Сијарто нема да ја добие нивната поддршка, објави „Маѓар немзет“.

Според него, Тиса ја предлага Агнес Форстхофер, потпретседателката на партијата, за оваа позиција, а десничарското движење Ми Хазанк претходно ја предложи Дора Дуро за истата позиција.

Во меѓувреме, Фидес и коалициската партија КДНП одржаа конститутивни состаноци на своите парламентарни групи за време на кои беа потврдени промените во составот на парламентарните клубови.

Повеќе од половина од пратениците на Фидес и дел од пратениците на КДНП поднесоа оставка од своите мандати, а нови членови од заедничката листа на Фидес и КДНП ги зазедоа своите места.

Пратеничката група на Фидес ја предводи Гергељ Гуљаш, а КДНП ја предводи Бенце Ретвари.

Се очекува во наредните денови Фидес да продолжи со својата внатрешна реорганизација преку партиските тела заедно со дефинирање нова политичка стратегија под водство на премиерот Виктор Орбан.