Трамп ги повика телевизијата Еј-Би-Си и компанијата Дизни да го отпуштат водителот Џими Кимел

Американскиот претседател Доналд Трамп денеска ги повика телевизијата Еј-Би-Си (ABC) и компанијата сопственик Дизни да го отпуштат водителот и домаќин на емисијата „Џими Кимел во живо“ поради неговите несоодветни коментари.

Кимел во својата емисија се шегуваше на сметка на вечерата на дописниците на Белата куќа, на која во саботата во хотел во Вашингтон со огнено оружје беа нападнати Трамп и претставници на неговата администрација, и ги исмеваше Трамп и првата дама на САД, Меланија Трамп, нарекувајќи ја, меѓу другото, „вдовица во исчекување“.

Трамп напиша дека Кимел „не е воопшто смешен“.

Претходно и првата дама на САД, како и многу од најголемите поддржувачи на Трамп, ја осудија шегата на Кимел.

На годишната вечера на Здружението на дописници на Белата куќа, на која во саботата присуствуваше Трамп во хотелот „Хилтон“ во Вашингтон, вооружен маж кој е идентификуван како Кол Томас Ален (31) испука повеќе истрели, по што сите присутни беа евакуирани. Осомничениот за пукањето нема кривично досие и не бил на радарот на полицијата.