Памфилова: Повеќе од 1.000 хакерски напади во Русија од почетокот на парламентарните избори

Руската Централна изборна комисија денеска објави дека регистрирала „повеќе од 1.000“ кибер напади насочени кон нарушување на парламентарните избори, како и обиди за хакирање на телекомуникациите кои покажуваат знаци на „украинско мешање“, објавија руските агенции.

„Забележани се повеќе од 1.000 DDoS напади врз руската инфраструктура вклучена во изборниот процес“, изјави Ела Памфилова, раководителка на изборната комисија, цитирана од руските новински агенции.

DDoS (дистрибуирано одбивање на услуга) нападите имаат за цел да го преплават системот со бранови континуирани барања.

„Нападите беа извршени од високо професионални и добро координирани групи, користејќи алатки за вештачка интелигенција, а повеќето од нив потекнуваат од странство“, рече Памфилова.

„Обиди за насочени напади беа извршени и врз руската телекомуникациска инфраструктура како целина“, рече таа, додавајќи дека „сите покажуваат знаци на украинско мешање“.

Веќе вчера, на вториот ден од гласањето, кое исто така се спроведува електронски во 33 региони, руската изборна комисија објави дека системот за гласање бил цел на „многу силен кибернапад“, кој продолжил во текот на целиот ден.