Трипуновски: Работиме на стабилен откуп и цена на суровото млеко

Министерот за земјоделство, шумарство и водостопанство, Цветан Трипуновски остварил средба со претставниците на поголемите млекарници во државата, на која се разговарало за стабилен откуп и цена на суровото млеко, покрај тоа што европскиот пазар и регионот се соочуваат со вишок на млеко.

Како што соопшти МЗШВ, на средбата се договорило дека откупната цена на суровото млекото ќе биде стабилна, како и дека нема да има неоткупено млеко од страна на млекарниците.

-Ќе се засилат контролите на пазарот со фокус на безбедноста и квалитетот на млекото и млечните производи, како и на добиточната храна, стои во соопштението на Министерството.

Оттаму додаваат дека министерството останува посветено на унапредување на млекопроизводниот сектор и обезбедување на одржливи услови за фармерите и млекарниците.