Нефункционални амбуланти и лоши евиденции, ДЗР со сериозни забелешки за Здравствениот дом Ресен

Државниот завод за ревизија (ДЗР) изврши ревизија на финансиските извештаи заедно со ревизија на усогласеност на Јавна здравствена установа Здравствен дом Ресен на сметката на основен буџет за 2024 година.

Од ДЗР информираа дека изразиле мислење со резерва за реалноста и објективноста на финансиските извештаи и за усогласеност на финансиските трансакции со релевантната законска регулатива за 2024 година.

„Со извршената ревизија на финансиските извештаи на Здравствениот дом за 2024 година во делот на евиденциите на постојаните средства со кои располага Здравствениот дом утврдени се состојби кои влијаат на реалноста и објективноста на Билансот на состојба. Тие се однесуваат на неусогласеност помеѓу сметководствената и материјалната евиденција и невоспоставена сметководствена евиденција на средства добиени по пат на донација, во делот на евиденциите на залихите со кои располага Здравствениот дом утврдивме дека не е воспоставена сметководствена и материјална евиденција на вакцини за имунизација на населението и лекови и потрошен материјал за третман на дијабетес кои во име и за сметка на Здравствениот дом ги набавува Министерството за здравство, дел од објектите со кои располага Здравствениот дом имаат статус на бесправно изградени објекти, во делот на набавка на тестови и материјали за лабораториски испитувања утврдивме несоодветна примена на Законот за јавните набавки“, соопштија од ДЗР.

За надминување на утврдените состојби ревизијата на ДЗР даде препораки со цел преземање на мерки и активности од одговорните лица во функција на подобрување на состојбите, меѓу кои и за реактивирање на амбулантите во рурално населените места.

„Здравствениот дом поседува неколку пункта, амбуланти со чие користење може да се обезбедат услови за давање на здравствени услуги во руралните места, но истите не се функционални и потребно е да се обезбеди чистење, делумно реновирање, набавка на мебел и опрема, да се обезбеди медицински персонал со кој до денот на ревизијата Здравствениот дом не располага поради неодобрени нови вработувања, средства за набавка на лекови бидејќи само дел од потребните лекарства може да се обезбедат од залихите на Здравствениот дом. Со извршениот увид во приложената документација нагласуваат од ДЗР, утврдивме дека со Програмата не е предвидена временска рамка на активности ниту пак потребен буџет за нивно извршување поради што неизвесно е кога и дали ќе се обезбеди примарна здравствена заштита во руралните места каде не е избран лекар. Имајќи го предвид наведеното ревизијата е на мислење дека Здравствениот дом во соработка со Министерството и Фондот треба да отпочне активности за обезбедување на средства, опрема и персонал за ставање во функција на пунктовите, амбулантите во рурално населените места“, велат од ДЗР.