Зеленски: Повторно го забавија „Ѕвездениот штит“, со што им се помага на Русите да нè убиваат

Украинскиот претседател Володимир Зеленски денеска објави дека украинските трупи веќе неколку дена регистрираат сериозни пречки во воениот сателитски систем „Ѕвезден штит“ (Starshield) над територијата на Украина, по целата линија на фронтот и во привремено окупираните области.

Зеленски излезе со објавата откако добил извештаи од министерот за одбрана, Јевгениј Хмара, и врховниот командант на вооружените сили на Украина, Михајло Драпати. Како што изјави, станува збор за систематско ограничување на брзината од 161 километар на час.

„Украинската армија веќе ги истражи околностите и не станува збор за случајни грешки, туку за систематски ограничувања на брзината. За нас, ова првенствено значи дека пресретнувањето на руски беспилотни летала со млазен погон е многу потешко. За жал, веќе имало напади што поминале бидејќи нашите системи за пресретнување не можат да достигнат доволна брзина и не успеваат да ги пресретнат навреме“, рече Зеленски.

Украинскиот претседател предупреди дека оваа ситуација директно им користи на руските сили.

„За жал, ова им помага на Русите да убиваат повеќе Украинци и да извршуваат попрецизни напади врз Украина. Се обидуваме да ги утврдиме сите околности со американската страна“, додаде Зеленски.

Слична ситуација се случи и во средината на октомври кога брзината на работа на сателитските мрежи „Старлинк“ (Starlink) и „Ѕвезден штит“ (Starshield) – воената верзија на системот на „СпајсИкс“ (SpaceX), управуван од американската влада, одеднаш беше ограничена на околу 160 километри на час, поради што украинските дронови-пресретнувачи ја изгубија врската при поголеми брзини.

Британски Ројтерс, повикувајќи се на американски и западни претставници, тогаш објави дека ваквата одлука за ограничување дошла од Белата куќа во време на тензии со администрацијата на претседателот Доналд Трамп околу украинските напади врз руските рафинерии за нафта, иако и Трамп и шефот на дипломатијата Марко Рубио и основачот на „СпајсИкс“, Елон Маск, јавно ја негираа одговорноста.

Целосната брзина на системот беше вратена дури на крајот на октомври, со што се врати способноста на украинската воздушна одбрана да пресретнува брзи руски цели. 

Најновото ограничување се појави само еден ден откако дводневните мировни преговори меѓу Русија и Украина, со посредство на САД, завршија без конкретен напредок во Абу Даби, а украинските претставници наведуваат дека за време на тие разговори не биле споменати ограничувањата за работата на „Ѕвездениот штит“.