Вимблдон го зголеми наградниот фонд за рекордни 20 отсто

Организаторите на грен слем турнирот во Вимблдон објавија денеска рекорден награден фонд од 64,2 милиони фунти за овогодишното издание, што е зголемување од 20 проценти во однос на лани.
Рекордното зголемување на наградниот фонд доаѓа во услови на растечки барања од тенисерите за поголем дел од приходите на грен слем турнирите.
Дел од тенисерите на неодамна одржаниот Ролан Гарос ги ограничија своите медиумски настапи, па дури и се заканија со идни бојкоти.
Победниците во поединечна машка и женска конкуренција годинава на Вимблдон ќе заработат 3,6 милиони фунти, што е зголемување од 20 проценти во однос на минатата година, додека поразените во финалето ќе инкасираат 1,8 милиони фунти.