Трамп и Рубио размислуваат да ја разрешат американската амбасадорка во Грција по сè повеќе извештаи за несоодветно однесување

АП (веб страна)

Претседателот Доналд Трамп и државниот секретар Марко Рубио размислуваат да ја разрешат американската амбасадорка во Грција Кимберли Гилфојл по низа извештаи во кои се тврди дека таа се впуштила во несоодветно и можеби незаконско однесување пред и за време на својот мандат во Атина.

Висок американски функционер вчера за Асошиетед Прес (АП) изјави дека Трамп и Рубио се „екстремно лути“ поради пријавеното однесување на Гилфојл и дека веројатно ќе одлучат какви мерки да преземат оваа недела, по денешниот празник Ден на Колумбо.

Функционерот, кој зборуваше под услов да остане анонимен за да ги посочи внатрешните разговори, рече дека Рубио бил особено налутен, меѓу другото, затоа што пред само една недела бил во посета на Атина, а Гилфојл присуствувала на повеќето, ако не и на сите негови настани и го пречекала со силна прегратка при пристигнувањето, додека обвинувањата се ширеле.

Во низа написи, „Волстрит џурнал“ објави дека Гилфојл се однесувала сомнително, меѓу другото дека наводно упатила закана до функционер на земјата домаќин, прифатила несоодветни подароци и услуги и понудила да го искористи своето влијание во администрацијата во замена за плаќање на голема сметка за кредитна картичка. Гилфојл не ги коментираше директно извештаите, но во соопштение објавено доцна синоќа нејзините адвокати негираа дека направила нешто лошо и тврдеа дека парите што ги барала од донаторот на Трамп се плаќање за услуги — јавни настапи и говорнички ангажмани што му претходат на нејзиното номинирање за амбасадорка — кои не биле платени.

Адвокатите, Дејвид Шварц и Џеси Бинал, ги отфрлија и обвинувањата за непримерно однесување поврзани со патувањата на Гилфојл со приватни авиони, велејќи дека пред секое такво патување таа „побарала, добила и следела упатства од Стејт департментот и ги почитувала патните прописи на Департментот“.

„Амбасадорката Гилфојл служела и ќе продолжи да служи со интегритет, чест и достоинство. Ги разгледуваме сите достапни правни средства за да го наплатиме овој долг, како и сите други можни тужби“, изјавија адвокатите.

Откако ја бранеше Гилфојл по првиот извештај, Рубио одбива јавно да ги коментира растечките обвинувања. Во средата Рубио рече: „Нашата амбасадорка беше силна амбасадорка овде“. Но откако доцна во средата се појави уште еден извештај, Рубио во четвртокот, пред да ја напушти Атина, им се налути на новинарите што го прашуваа за обвинувањата, велејќи дека не знае дали се вистинити и дека нема да одговара ако не може да ги потврди.

„Вие шетате наоколу и мислите дека затоа што некој извор ви кажал нешто, а вие сте го објавиле, тоа е евангелие. Не е евангелие. Не е евангелие за мене. Така ние не работиме“, рече Рубио пред скалилата на својот авион, додека Гилфојл, која дојде да го испрати, гледаше од страна.

Функционерот рече дека Рубио станувал сè понезадоволен како што се множеле извештаите.

Друг американски функционер, кој исто така зборуваше под услов да остане анонимен за да зборува за кадровски прашања, изјави дека генералниот инспектор на Стејт департментот ги испитува обвинувањата, кои за прв пат почнаа да се појавуваат во „Волстрит Џурнал“ доцна минатиот месец, а оттогаш се намножија.

Вториот функционер не можеше да каже дали официјално е започната истрага на генералниот инспектор. Генералните инспектори честопати спроведуваат неформални проверки на поплаки против вработени, а многу пати тие проверки не прераснуваат во целосна истрага, која може да доведе до дисциплински мерки, вклучително и до отказ.

Стејт департментот одби да коментира за евентуална истрага на генералниот инспектор.

Двајцата највисоко рангирани демократи во Одборот за надворешни работи на Претставничкиот дом и во Комисијата за надворешни односи на Сенатот, пратеникот Грегори Микс од Њујорк и сенаторката Џин Шахин од Њу Хeмпшир, како и највисокиот демократ во Одборот на Претставничкиот дом за надзор и владина реформа, Роберт Гарсија, демократ од Калифорнија, веќе побараа истрага против Гилфојл.

Од крајот на септември, „Џурнал“ детално опиша бројни случаи на сомнително однесување на Гилфојл. Во првиот извештај стои дека таа им рекла на гостите на еден прием дека САД можат да ја поткопаат грчката влада ако сакаат, дека ги промовирала деловните интереси на една одредена грчка градежна и енергетска компанија и дека на нејзиниот лобист му дозволила пристап до приватни дипломатски средби.

Додека Рубио беше во Атина, „Џурнал“ објави, повикувајќи се на текстуални пораки, дека Гилфојл побарала од еден донатор и поддржувач на Трамп да плати сметка од 100.000 долари за кредитна картичка непосредно пред нејзиното сослушување за потврда, ветувајќи му пристап до функционери во администрацијата ако го стори тоа.