Северна Кореја спроведе голема ракетна вежба: Погодени се сите цели со 100-процентна точност

Северна Кореја соопшти дека нејзината војска спровела заедничка вежба на артилериските и ракетните единици, само еден ден по завршувањето на заедничките воени маневри на САД, Јужна Кореја и Јапонија.

Државната агенција КЦНА соопшти дека вежбата се одржала во саботата и дека во неа учествувале избрани единици од пет артилериски и ракетни формации на Корејската народна армија.

За време на вежбата биле користени „нови борбени системи“ вклучувајќи разни видови напаѓачки дронови, тактички крстосувачки ракети, повеќецевни ракетни системи од голем калибар со термобарична муниција, како и тактички балистички ракети.

Вежбата ја надгледувал маршалот Пак Јонг Чон, потпретседател на Централната воена комисија на владејачката Работничка партија и директорот на Управата за артилерија, генерал-мајор Ју Чанг Сон.

КЦНА тврди дека сите системи што се користеле за време на вежбата ги погодиле предвидените цели со „100 проценти точност“ и ја демонстрирале способноста за извршување истовремени концентрирани напади.

Ју рече дека ваквите вежби имаат цел да ја зајакнат способноста за стратешки контранапад и побрз одговор на единиците во итни ситуации.

Американската војска во петокот соопшти дека ги следи неколкуте севернокорејски лансирања ракети, но процени дека тие не претставуваат непосредна закана за американскиот воен персонал, територијата на САД или сојузниците во регионот.

Лансирањата се случија само еден ден откако Јужна Кореја, САД и Јапонија ја завршија петдневната трилатерална поморска вежба Freedom Edge во меѓународни води јужно од јужнокорејскиот остров Чеџу.