Во Велес гореше сува трева на две блиски локации

Во новиот дел на Велес денеска гореше сува трева на две локации на улица „Луј Пастер“ која води покрај пругата Велес-Битола кај поранешната фабрика „Киро Ќучук“ и во близина на касарната. Двата пожари брзо се изгаснати со брза интервенција на  екипите на Противпожарната единица Велес и спречена е поголема материјална, како и штета по животната средина во градот.

Како што попладнево  информираат од ТППЕ Велес, утрово во 6:25 часот била примена дојава за запалена трева на улицата „Луј Пастер“ што води покрај пругата Велес-Битола во близина на поранешната фабрика „Киро Ќучук“. ТППЕ Велес излегла веднаш на лице место со едно противпожарно возило и тројца пожарникари по што пожарот за кратко време бил изгаснат и било спречено да се прошири на куќите и други објекти во близината.

Втората дојава за запалена сува трева кај касарната во Велес во ТПП Велес била примена утрово во 9:10 часот. Екипа на ТППЕ Велес веднаш излегла на терен со едно противпожарно возило и двајца пожарникари. За кратко време пожарот бил изгаснат и било спречено да се прошири на околните објекти и згради.

Од ТППЕ Велес апелираат до граѓаните доколку забележат пожар веднаш да се јават на бесплатните телефонски броеви 193 или 112.