Депонијата кај селото Бели повторно намерно запалена, од Општина Кочани апелираат до граѓаните на совесност

Според Општина Кочани, градската депонија кај селото Бели, повторно е изложена на неодговорно и несовесно однесување кое директно го загрозува здравјето на граѓаните и животната средина.

-Депонијата повторно е намерно запалена од несовесни поединци. Ваквите постапки не се само чин на неодговорност, туку претставуваат сериозна опасност за сите нас. Наместо да придонесуваат за почиста и побезбедна средина, поединци свесно создаваат проблеми чии последици ги чувствува целата заедница, стои во соопштението на локалната самоуправа.

Откако е забележан огнот, претставници на Општината и на  КЈП „Водовод“ реагираа веднаш  и се на терен, каде со максимален ангажман работат на локализирање и гаснење на пожарот. 

Од Општината и Комуналното претпријатие  упатуваат апел до граѓаните да покажат совест и одговорност, потенцирајќи дека Кочани заслужува чиста и безбедна средина. 

Општина Кочани, стои во соопштението,  ќе продолжи да презема сè што е во нејзина надлежност за справување со ваквите ситуации и ќе инсистира на утврдување одговорност за секој што свесно го загрозува јавниот интерес