ОЕЦД предупредува на проблеми во снабдувањето со критични суровини

Организација за економска соработка и развој (ОЕЦД) денеска предупреди дека сè поголемите ограничувања на извозот на критични суровини ги ставаат глобалните синџири на снабдување под притисок, при што неколку минерали клучни за дигиталната технологија и обновливата енергија се сè повеќе погодени од ваквите мерки.

Бројот на земји кои воведуваат вакви ограничувања пораснал, особено во Африка и Азија, соопшти ОЕЦД.

Одредени минерали од суштинско значење за енергетските системи – вклучувајќи кобалт, манган, графит и ретки земни метали – се меѓу најпогодените. Околу 70 проценти од глобалниот извоз на кобалт и манган, кои се витални за клучните индустрии како што се производството на батерии и чипови, беа предмет на најмалку едно извозно ограничување во периодот меѓу 2022 и 2024 година.

Иако побарувачката за критични суровини рапидно расте, понудата се приспособува само полека и останува високо концентрирана, нагласи ОЕЦД.

– Земјите ширум светот зависат од сигурен пристап до критичните суровини, кои се од суштинско значење за економскиот раст, иновациите и енергетската безбедност – изјави генералниот секретар на ОЕЦД, Матијас Корман, на Форумот на ОЕЦД за критични минерали во Истанбул.

– Извозните ограничувања можат да ја влошат ранливоста на високо концентрираните синџири на снабдување преку ограничување на извозните количини и зголемување на цените – нагласи тој.

Корман додаде дека е важно ограничувањата да се направат потранспарентни за да се поттикне отворањето и диверзификацијата на пазарите за критични минерали и да се негуваат заемно корисни партнерства со земјите производители.