За парламентарниот изборен процес во недела во Косово ангажирани околу 100 обвинители

Канцеларијата на главниот обвинител на Косово објави дека косовското обвинителство ги завршило сите потребни подготовки за парламентарните избори што ќе се одржат во недела, 28 декември, и дека околу 100 обвинители и службеници од обвинителскиот систем ќе бидат ангажирани во тој процес.

Според најавата, главната цел на овие подготовки е да се заштити слободниот глас на граѓаните и да се обезбеди интегритетот на изборниот процес.

„Тие ќе бидат распоредени низ целата територија на Република Косово и ќе бидат во состојба на готовност сè додека изборниот процес не биде целосно завршен, со цел да се третираат и гонат сите можни прекршувања или законски прекршоци што може да се случат за време на изборите“, се наведува во соопштението на канцеларијата на главниот обвинител.

Главниот обвинител ги повика граѓаните, политичките субјекти, институциите и разните организации да го пријават до надлежните обвинителства секој случај во кој постои сомневање дека имало злоупотреба или манипулација со гласовите, во која било форма и од било кого.

Истовремено, судии ќе бидат дежурни во сите судови и судски оддели во Косово кои ќе постапуваат по барањата на обвинителството и полицијата во случај на прекршоци или законски прекршоци што може да се случат за време на изборите.