Суд во Перу го осуди поранешниот претседател Вискара на 14 години затвор за корупција

Суд во Перу го осуди поранешниот претседател Мартин Вискара на 14 години затвор, откако го прогласи за виновен за примање мито години пред да ја преземе функцијата.

Британските медиуми пренесуваат дека според судската пресуда, Вискара примил мито од 676.000 долари од градежни фирми во замена за договори за јавни работи додека бил гувернер на јужниот регион Мокегва од 2011 до 2014 година.

За време на судењето, кое започна минатиот октомври, Вискара ги негираше обвиненијата, тврдејќи дека е жртва на политички прогон.

Тој дојде на власт во 2018 година откако неговиот претходник поднесе оставка, а две години подоцна беше отстранет од Конгресот поради истраги за корупција.

Неговиот постар брат, Марио Вискара, планира да се кандидира на претседателските избори во април 2026 година за партијата „Перу на прво место“, во која поранешниот претседател беше клучен советник.

Перу доживеа шест смени на претседатели од 2018 година поради импичмент и оставки, честопати поттикнати од корупциски скандали. Тројца други поранешни претседатели се во затвор.