Роуан Аткинсон се враќа на театарската сцена

Британскиот актер и комичар Роуан Аткинсон, најпознат како Мистер Бин, Црна Змија (Блекадер) и Џони Инглиш, се враќа на сцената со ново шоу со скечеви насловено „Роуан во живо (Rowan Live)“, коешто следната година ќе се изведува во лондонскиот Вест Енд.

Аткинсон ќе одржи 30 изведби во Театарот „Џилијан Лин“ (Gillian Lynne Theatre). Програмата ќе опфати некои од неговите најпознати ликови и скечеви, како и нов материјал подготвен специјално за оваа продукција. За 71-годишниот Аткинсон, ова претставува прво шоу со скечеви на Вест Енд по 40 години, означувајќи враќање кон форматот што ја почна неговата кариера.

– Минаа 40 години откако последен пат изведов комичен настап со скечеви на Вест Енд. Помислив, би било забавно повторно да им се навратам на скечевите со коишто сè започна за Ричард Кертис и мене – и кои ги создадоа моите најпознати ликови, а истовремено да претставам и нов материјал напишан специјално за ова шоу, изјави Аткинсон.

„Роуан во живо“ повторно ќе го спои со долгогодишните соработници Ричард Кертис, Бен Елтон и Хауард Гудал. Покрај култните скечеви од неговата кариера, шоуто ќе вклучува и нов материјал што тие заеднички го развивале. Режисер на продукцијата ќе биде Раз Шо, а музиката е компонирана од Гудал. Програмата ќе ги претстави некои од најпознатите ликови на Аткинсон, вклучувајќи ги Мистер Бин и Едмунд Блекадер, а ќе има и скечеви од емисијата „Ова не се вестите во 9 ч. (Not the Nine O’Clock News)“.

Претставата ќе има вкупно 30 изведби – од 8 февруари до 13 март 2027 година.