По 24 години, Фил Колинс и Пол Макартни ги закопаа секирите

Британските музичари Фил Колинс и Пол Макартни се смирија по кавгата што траеше речиси 24 години. Колинс – поранешен тапанар и вокал на групата „Џенезис“ откри дека двајцата неодамна разговарале по телефон и ги расчистиле недоразбирањата.

Во интервју за емисијата „Нецензурирано со Пирс Морган“, тој раскажа за инцидентот што ја предизвикал тензијата меѓу него и легендарниот музичар од „Битлс“. Настанот се случил во 2002 година, кога Колинс и Макартни настапувале на концертот по повод Златниот јубилеј на кралицата Елизабета Втора, пред Бакингемската палата. За време на пробите, Колинс со себе носел ретко прво издание на книга од авторот и биограф на „Битлс“, Хантер Дејвис, и го замолил Пол Макартни да му ја потпише. Според Колинс, музичарот се свртел кон својата тогашна сопруга, Хедер Милс, и рекол: „Нашиот мал Фил е голем обожавател на ’Битлси‘, нели?“ Колинс ја доживеал таа забелешка како потценувачка.

– Си помислив: Кој кретен. Не можев против себеси, едноставно така размислував – вели Колинс кај Пирс Морган.

Сепак, денес Фил (75) признава дека веројатно им придал поголемо значење на тие зборови отколку што Пол (84) имал намера.

Повеќе од 20 години подоцна, токму Пол Макартни го контактирал поранешниот Колинс. Според вториов, повод била добротворно наддавање за организацијата „Кинг’с траст (The King’s Trust)“, за којашто тој собирал музички предмети од познати колеги. Откако дознал за иницијативата, Макартни му се јавил. За време на разговорот, Пол директно ја отворил темата за нивниот однос и прашал за долготрајниот набој.

– Му реков: Посакувам никогаш да не го кажев тоа, Пол. Навистина ми е жал што го кажав. А тој ми одговори: Мислев дека сè е во ред меѓу нас, раскажува Фил Колинс. – И така се смиривме, додава.

Фил Колинс притоа признава дека му се извинил на Пол Макартни и претпоставува дека неговите јавни коментари низ годините го повредиле другиот музичар.