Ди Каприо и Безос со иницијатива вредна 200 милиони долари ќе се справуваат со исчезнувањето на најзагрозените животински видови

Под името „Финикс спишис“, актерот Леонардо ди Каприо и основачот на „Амазон“, Џеф Безос преку своите фондации „Ривајлд“ и „Фондот за Земјата“, започнаа иницијатива вредна 200 милиони долари за спасување на 100 најзагрозени животински видови на Земјата.

Во фокусот на иницијативата ќе бидат опфатени десетици ретки видови од различни делови на светот, вклучувајќи лемури, саламандери, жаби, желки, игуани и други загрозени животни. Меѓу нив се и златнокрунестата сифака, висајанската брадавичеста свиња, малајскиот панголин, розовата копнена игуана и долгоклуната ехидна на Атенборо, за кои се потребни итни мерки за зачувување на популацијата.

Проектот во соработка со локалните власти, еколошките организации и претставници на домородните заедници, има за цел да обезбеди секојдневна поддршка за програми што опфаќаат обновување на популациите на најзагрозените животински видови, како и зачувување на нивните природни живеалишта.