СЗО: Корпорациите за ултрапреработена храна го попречуваат решавањето на светската криза со дебелината

Најголемите светски корпорации што произведуваат ултрапреработена храна ги попречуваат глобалните напори за справување со кризата со дебелината, бидејќи поднесуваат тужби против владите кои се обидуваат да промовираат поздрава исхрана, изјави денеска генералниот директор на Светската здравствена организација (СЗО), Тедрос Аданом Гебрејесус.

Тој ги обвини глобалните прехранбени компании дека го попречуваат усвојувањето на клучните мерки за унапредување на јавното здравје и потсети дека во светот се трошат милијарди долари за здравствени услуги и судски трошоци.

Речиси една милијарда луѓе ширум светот живеат со дебелина, а нездравата исхрана е една од главните причини за срцеви заболувања, рак и дијабетес тип 2.

Потрошувачката на ултрапреработена храна расте и сега сочинува околу половина од просечната исхрана во многу земји, вклучувајќи ги Велика Британија, САД и Австралија.

Владите ширум светот, свесни за здравствените и економските последици од кризата со дебелината, почнаа да воведуваат мерки со цел да ја намалат потрошувачката на брза храна и да промовираат поздрава исхрана.

Овие мерки вклучуваат предупредувања на предната страна од пакувањата на производите, како и ограничувања на маркетингот и рекламирањето на нездрави производи.