Германија останува на ставот за санкциите по американскиот договор со Русија за дизелот

Германија денеска го потврди својот цврст став во врска со санкциите против Русија, по контроверзниот договор за испорака на дизел што го постигнаа американскиот претседател Доналд Трамп и рускиот претседател Владимир Путин.

– Германската влада останува на одлуките за санкции против Русија и заедно со европските партнери работи на дополнителни санкции – изјави портпаролот на Мерц, Штефан Корнелиус. „Поддршката за Украина во нејзината одбранбена борба останува несоборлива“, додаде тој.

Портпаролката на министерката за економија, Катерина Рајхе, во Берлин исто така рече дека: „Германија безусловно стои зад пакетите санкции“.

ЕУ воведе санкции за руската нафта и нафтени деривати како одговор на инвазијата на Москва врз Украина. Германија повеќе не увезува нафта или нафтени деривати од Русија, истакна портпаролката.

– Нашето снабдување тука е диверзифицирано; ние сме независни од руската нафта – рече таа, додавајќи дека оттогаш е загарантирана безбедноста на снабдувањето.

По телефонскиот разговор со Путин вчера, Трамп објави договор Русија да испорача стотици илјади тони дизел на американскиот и на глобалниот пазар. Вашингтон планира привремено да ги олесни санкциите за рускиот дизел за да овозможи реализација на пратките.

Кремљ го потврди договорот.