До 13 часот вкупно 14 пожари на отворен простор, пет се активни, три под контрола

До 13 часот денеска во земјава се регистрирани вкупно 14 пожари на отворен простор, од кои пет се активни, три се ставени под контрола, а шест се целосно изгаснати, информира Центарот за управување со кризи (ЦУК).

Активни пожари има во општините Студеничани и Зелениково, каде огнот зафаќа мешана шума во реонот на селата Моране, Вртекица и Рамни Габер, со крак кон Палиград, како и над селото Вражале.

Пожар е активен и во реонот на селото Трново во Општина Гостивар, со ширење кон селата Битово, Заград и Страјане во Општина Македонски Брод. Таму гори нискостеблеста шума, ниска вегетација, пасишта и папрат.

Во Општина Росоман активен е пожар кај селото Манастирец, каде се зафатени лозови и овошни насади. Пожар има и кај селото Тисовица во Општина Зелениково, каде гори мешана шума и ниска вегетација, како и над селото Нежилово во Општина Чашка, во месноста Сватови, каде се зафатени ниска вегетација и смреки.

Три пожари се ставени под контрола. Во Општина Кичево гори високостеблеста букова шума кај селото Тајмиште, во месноста Дарда. Под контрола е и пожарот на градската депонија „Мелци“ во Кавадарци, како и пожарот на депонијата во Делчево.

Во текот на денот се изгаснати шест пожари. Тие биле регистрирани во Желино, Теарце, Македонски Брод, Кичево, Делчево и Градско, а горела главно ниска вегетација, грмушки, меѓи и шума.