Кина планира градови поприспособени за младите поради падот на наталитетот

Кина претстави нов план со кој ги повикува градовите да бидат поприспособени на младите и на семејствата преку промени во урбаното планирање, домувањето, образованието и јавните услуги како дел од пошироката стратегија за ублажување на демографскиот пад.

Планот, објавен од страна на 15 кинески министерства, предвидува развој на таканаречени градови ориентирани кон младите, со фокус на вработувањето, домувањето, здравствената заштита и поддршката за семејствата.

Иницијативата следува откога властите во Кина ја најавија целта за изградба на „општество приспособено на раѓање“ како одговор на долготрајниот пад на бројот на жители и на наталитетот.

Според официјалните податоци, бројот на родени во Кина падна на 7,92 милиони во 2025 година, а вкупното население се намали за 3,39 милиони, што претставува четврти последователен годишен пад.

Новите мерки вклучуваат зголемување на субвенциите за грижа за децата, унапредување на здравствените услуги за мајките и децата, проширување на капацитетите на градинките и училиштата, подобар пристап до образование за децата на мигрантите.

Властите наведоа дека целта е до 2030 година концептот на градови приспособени на младите да биде широко применет, а до 2035 година да се воспостави позрел систем за поддршка на развојот на младите и семејствата.