Артета: Секогаш сме искрени, ако си здрав, мора да играш за репрезентацијата

Тренерот на Арсенал, Микел Артета, одговори на критиките кон клубот поради повлекувањето на 11 играчи од репрезентативните обврски за време на мартовската пауза, наведувајќи здравствени проблеми.

– Кога станува збор за комуникација на состојбата на секој играч, секогаш сме искрени, а потоа мора да се донесе медицинска одлука. Заклучоците во врска со нашите играчи беа јасни. Кога си здрав и достапен за репрезентативни обврски, мора да играш. Многу сме горди што толку многу наши играчи се повикани на репрезентативни обврски, изјави Артета за „Би-би-си“. 

Претходно тренерот на Манчестер сити, Пеп Гвардиола, ги нарече меѓународните пријателски натпревари во март бесмислени. 

Шпанскиот фудбалски стручњак верува дека ваквите натпревари претставуваат превисок ризик од повреди за играчите кои штотуку влегуваат во најважниот период за своите клубови.