Куба објави одлука за ослободување на повеќе од 2.000 затвореници

Куба ќе ослободи 2.010 затвореници, објави денеска кубанската влада, како што објавија државните медиуми.

Комунистичката влада на Куба објави дека ќе ослободи 2.010 затвореници „во хуманитарен и суверен гест“, додека води преговори со администрацијата на американскиот претседател Доналд Трамп.

Ова е втор пат оваа година земјата да донесе одлука за амнестија, додека разговорите со САД се во тек.

„Волстрит џурнал“ наведува дека ослободувањето на затворениците, во пресрет на католичкиот Велигден, дошло откако папата Лав Четиринаесетти изразил загриженост за влошувањето на условите во Куба, каде што недостигот на гориво довел до сè почести и продолжени прекини на електричната енергија, и побарал од САД и Куба да ги решат своите разлики преку дијалог.

Владата одлучила да ги помилува затворениците врз основа на нивното добро однесување, здравствена состојба и природата на „извршените дела“, според Гранма, официјалниот весник на владејачката Комунистичка партија.

Меѓу затворениците има млади луѓе, жени, луѓе над 60 години и странци, се додава во соопштението.

Според Си-Ен-Ен, на списокот не се вклучени затвореници кои извршиле кривични дела како што се убиство, сексуален напад или „кривични дела против владата“.