Николоски предлага три решенија за проблемот на транспортерите

Вицепремиерот и министер за транспорт Александар Николоски, денеска на ГП Блаце даде силна подршка на домашните транспортери кои од денеска стапуваат во седумдневен предупредувачки протест заедно со превозниците од Србија, Црна Гора и БиХ во знак на револт против новите правила за електронската евиденција во шенген зоната.

Во прилог интегралната изјава на вицепремиерoт Николоски:

“Би сакал да искажам подршка во мое име и во име на Владата на овој протест на превозниците и тоа е причината зошто сум денеска на овој граничен премин, затоа што овој протест е предупредувачки. Превознциите сакаат да покажат што ќе се случува од 10 април па натаму. Ова е едно предупредување и сметам дека е навремено со цел да се искористат месеците февруари и март и земјите членки на шенген зоната да изнајдат решение.

Во принцип име три возможни решенија, првото е да се одложи примената на електронскиот систем за превозниците, второто е да се зголеми бројот на денови кои што можат да ги поминуваат од сегашните 180 на 250 денови во шенген зоната, соодветно поделено во циклуси и третото решение е да не се третираат како туристи, туку да се третираат како професионалци и врз основа на тоа или да бидат исклучени од овие правила и соодветно со работни визи како што прави Швајцарија, тоа да се уреди и на тој начин да можат слободно да транзитираат низ земјите од шенген зоната.

Се спротивно од ова мислам дека ќе има големи последици и за македонската и за регионалната, но и за европската економија. Да не заборавиме дека најголем дел од странските инвестиции од целиот регионт се од земјите од ЕУ и шенген зоната, тие најчесто тука произведуваат полупроизводи кои ги извезуваат во сопствените земји, да не зборувам за земјоделските производи, за транзитот, да не зборувам за она што го произведува Грција и исто така оди на север и да не зборувам за главниот трговски коридор на Југоисточна Европа, а тоа е Коридор 10 кој што значи крвоток на целокупната економијата.

Би апелирал, би замолил уште еднаш да се размисли, оваа моќна порака испратена денеска од земјите од Западен Балкан мислам дека гласно ќе одекне. Ние година дена предупредуваме, зборуваме со претставници на ЕК, но за жал до сега немаа слух и мислам дека после ова ќе им слух и ќе најдат решеие со цел да не запре македонската, регионалната па и европската економија. 

Јас во петокот зборував со министерот за транспорт на Грција затоа што и тие се во оваа ситуација бидејќи ако не е Македонија и Србија и тие не можат да извезвуваат по патен сообраќај. Во среда ќе одам во Загреб да се сретнам со вицепремиерот и министер за транспорт на Хрватска, а ќе се обидам да искмуницирам и со останатите земји, како би можеле да направат и тие дополнителен притисок за оваа ситуација”- изјави вицепремиерот.