Прв протестен „Марш за ангелите“ откако започна судењето во Идризово

Во Кочани денеска родителите на починатите во трагичниот пожар во дискотеката „Пулс“ го одржаа првиот марш за нивните ангели откако започна судскиот процес во Идризово. 

Обраќајќи и се на јавноста од пред Основниот суд, тие рекоа дека првото рочиште го дочекале со надеж, второто  со треперење, после што се соочиле со тешко разочарување, затоа што тоа било одложено, според нив, без потреба и чувство за болката што ја носат.

Исто така, според родителите, недозволиво е организирање на судскиот процес на начин што тие ќе делат ист паркинг простор со обвинетите. 

– Како да сме еднакви страни во нечиј административен записник, а не родители што ги изгубиле своите деца. За нас тоа не беше само „логистичка грешка“. Тоа беше уште едно понижување. Како да не е доволно што секој ден живееме со најголемата загуба, сега дополнително нè ставаат во ситуација да ги гледаме обвинетите од неколку метри, без никаква заштита, без никакво разбирање за нашата болка, посочи Александар Наунов, татко на  девојче што почина на 16 – ти март во „Пулс“. 

Родителите на денешниот 29. „Марш за ангелите“ побараа од  дел од адвокатите кои ги застапуваат обвинетите во случајот, особено од оние од Кочани, да покажат човечност и разбирање за нивните деца.

-На истиот простор, повторно лице в лице се најдовме и со кочанските адвокати што ги бранат обвинетите за смртта на нашите деца во дискотеката „Пулс“. Тие, наместо да се оддалечат и да покажат барем малку човечност, наместо барем да молчат во моментот кога ние сме најслаби, повторно ни објаснуваа дека „имале право“ да ги бранат своите клиенти. Свесни сме дека секој има право на одбрана. Знаеме дека адвокатите си ја вршат својата професија. Но исто така знаеме дека дел од тие луѓе имаат свои блиски, роднини, познаници кои исто така беа во „Пулс“, кои беа повредени или, за жал, ги нема повеќе. А ние — според нив — не требало да реагираме, не требало да се побуниме, не требало да кажеме ништо, нагласи Наунов.

Родителите на загинатите во кочанската дискотека и денеска повторија дека се во исчекување на обвинителен акт за осомничените полициски службеници.

Протестниот „Марш за ангелите“ денеска започна од „Паркот на Револуцијата“, преку Трговскиот центар, Управата за јавни приходи и кочанската полиција, продолжи кон кружниот тек кај двојниот мост во Кочани каде имаше кратко запирање. Колоната продолжи кон кочанскиот суд и обвинителство и се и се врати во „Паркот на Револуцијата“.