Дигитален самит на Западен Балкан 2025 во Скопје: Регионот презема смели чекори кон дигитално интегрирана иднина

Денес во Скопје беше отворено седмото издание на Дигиталниот самит на Западен Балкан (ДСЗБ), кој е заеднички организиран од страна на Владата на Северна Македонија и Советот за регионална соработка (СРС). Ова ја докажува посветеноста на регионот кон дигитална преобразба, соработка и европска интеграција.

Во соопштението од Советот за регионална соработка (СРС), кое го пренесе МИА во целост, генералниот секретар на СРС, Амер Капетановиќ, во своето воведно обраќање ги потенцираше досегашните остварувања и приоритетите за иднината.

“Дигитализацијата не е само цел, таа е трансформативна сила. Успехот на нашиот режим ‘Roam Like at Home’ покажува што регионот може да постигне кога работиме заедно. Сега мораме да ги направиме следните чекори: изградба на интероперабилни дигитални ID паричници, унапредување на доверливите услуги, усогласување со дигиталните рамки на ЕУ и обезбедување на алатки за младите и бизнисите за да напредок во дигиталната ера,“ изјави Капетановиќ.

Премиерот на Северна Македонија, Христијан Мицкоски, при отворањето на Самитот, ја нагласи значајноста на вложувањето во дигитализација за благосостојбата и стабилноста на регионот. Тој посочи дека штом граѓаните ќе почнат да забележуваат видливи резултати од дигиталната трансформација, довербата се зголемува и се создава замав, што креира циклус кој поттикнува дополнителен напредок и иновации.

На Самитот свои обраќања имаа и партнерите: Ренате Николaj, заменик генерален директор за комуникациски мрежи, содржина и технологија во Европската комисија; Томас Ламанаускас, заменик генерален секретар на Меѓународната телекомуникациска унија; Томас Јарзомбек, парламентарен државен секретар во германското Сојузно министерство за дигитализација и модернизација на владата; и Свјатослав Сенјута, регионален лидер за владини решенија во Visa. Тие ја подвлекоа важноста на регионалната соработка, усогласувањето со ЕУ и партнерствата со приватниот сектор во унапредувањето на дигиталната агенда.

Подоцна во текот на денот, Данијела Гачевиќ, раководител на Програмскиот оддел во СРС, ќе го модерира министерскиот панел на тема „Дигитално по дефиниција – Јавните услуги во функција на сите“, на кој ќе учествуваат министри и високи претставници од Западен Балкан, меѓу кои: Делина Ибрахимај, министерка за економија и иновации на Албанија; Мараш Дукај, црногорски министер за јавна администрација; Стефан Андоновски, министер за дигитална трансформација на Северна Македонија; Славиша Антиќ, државен секретар во Министерството за информации и технологија на Србија; Гетоар Мјеку, косовски заменик министер за економија; и Алмир Бањевиќ, директор на IDDEEA во Босна и Херцеговина.

Во следните два дена, учесниците на ДСЗБ 2025 – креатори на политики, експерти и иноватори од целиот Западен Балкан, ЕУ и пошироко – ќе разговараат за дигитални сервиси, дигиталниот паричник, интероперабилноста, вештачката интелигенција, сајбер-безбедноста, е-услугите и развојот на вештини.

Дигиталниот Самит на Западен Балкан се одвива во рамки на Акцискиот план за Заедничкиот регионален пазар и Планот за раст на ЕУ, и е финансиран од Европската унија.

За повеќе информации, посетете: www. digitalsummitwb6. com.