Прв академски час на штипскиот Универзитет „Гоце Делчев“

На Универзитетот „Гоце Делчев“ (УГД)-Штип денеска се одржа првиот академски час за над 1.500 студенти кои се запишаа во прва година на еден од 12 факултети и трите академии. Ректорот на УГД-Штип, Дејан Мираковски истакна дека студентите на овој Универзитет можат да учат од најмодерни библиотеки, во најмодерни лабаратории, да бидат дел од меѓународни размени и да добијат европска диплома.

-Ме радува што во уште во првиот уписен рок над 90% од запишаните студенти го избраа нашиот Универзитет. Што значи Универзитетот „Гоце Делчев“ станува прв и препознатлив избор за високото образование. На студентите ќе им посакам многу успех, во учењето да бидат свои, да бидат истрајни се надевам дека Универзитетот заедно со сите професори и вработени ќе им биде поддршка во патот, кој ги очекува, вели Мираковски.

Прашан што нуди штипскиот Универзитетот преку зачленувањето во една од европските Алијанси, во која членуваат повеќе Универзитет од неколку европски земји, Мираковски вели дека на студентите им овозможува многу висок степен на мобилност.

-Тоа ќе им овозможи многу поголема отвореност, достапност до европските Универзитети, до формите на образование коишто ги нудат Универзитетите, кои се партнери во Алијансата. Дополнотилно правиме исчекор и во лабараториските услови, вели Мираковски.

Тој додава дека УГД-Штип е и меѓу 30 Универзитети во Европа, кои од Европската комисија е прогласен како шампион за иницијативи за мобилност.

УГД-Штип на трите циклуси на студии има околу 8.000 студенти, а првиот академски час се одржа денеска на штипскиот Економски факултет.