Црногорски медиуми објавија делови од извештајот на ЕК: Постигнат е добар напредок во Црна Гора во сите поглавја за кои се преговара

Црна Гора постигна добар напредок во сите поглавја за кои моментално преговара со Европската Унија (ЕУ), меѓутоа, неодамна објавениот „евро модел“ може да претставува ризик за одржливоста на јавните финансии, според годишниот извештај на Европската комисија (ЕК) за напредокот на Црна Гора, кој ќе биде презентиран денеска во Брисел.

Во извештајот, во кој ТВ Вијести имаше увид, се наведува дека е постигнат добар напредок во клучните поглавја 23 и 24. Брисел истакнува дека завршувањето на уставните амандмани – поточно оние поврзани со укинувањето на имунитетот и воведувањето проверки на интегритетот за членовите на Владата – е најважната преостаната обврска.

ЕК, исто така, укажува на потребата од подобри резултати во истрагите, гонењата и конечните пресуди во случаите на корупција, особено оние на високо ниво, со оглед на тоа што бројот на конечни пресуди е сè уште низок.

Дополнително, постои итна потреба од зајакнување на капацитетите и подобрување на условите за работа во Специјалното државно обвинителство, Специјалното полициско одделение и Специјалното одделение на Високиот суд во Подгорица.

Кога станува збор за неодамнешните најави на премиерот Милојко Спајиќ за зголемување на платите од јануари, ЕК предупредува дека „евро моделот“ може да ја загрози одржливоста на јавните финансии и надворешната рамнотежа, и забележува дека, по консултации со релевантните актери, потребна е подетална проценка.

Брисел наведува дека буџетскиот дефицит на Црна Гора го надминал планираното ниво минатата година, како и дека сè уште постојат фискални ранливости поради високото ниво на задолжителни расходи и значителните потреби за рефинансирање на долгот.

  Европската комисија предлага Владата да ги ограничи јавните расходи – како и вкупните распределби на платите во јавниот сектор – на среден рок и да спроведе мерки за зголемување на приходите за да се обезбеди усогласеност со фискалните правила.

Според документот во кој РСЕ имаа увид, ЕК подготвила патоказ за земјите што најдалеку напреднале во процесот на пристапување, имено – покрај Црна Гора – Албанија, Украина и Молдавија.

Планот предвидува Црна Гора да ги затвори преостанатите поглавја од преговорите за време на меѓувладините конференции во ноември и декември, додека нацрт-договорот за пристапување треба да биде финализиран до пролетта следната година.

Потпишувањето на договорот би можело да се случи до летото 2027 година, најверојатно во јуни.

Досега, Црна Гора привремено затвори 21 од 33 преговарачки поглавја, а се очекува дека барем уште едно ќе биде затворено до крајот на оваа недела.

Според индикативниот план на Европската комисија, поглавјата поврзани со енергетиката, транспортната политика, безбедноста на храната, ветеринарната и фитосанитарната политика, оданочувањето и слободното движење на стоки треба привремено да се затворат во ноември.

Затворањето на преостанатите поглавја е закажано за декември, вклучувајќи ги и оние за финансиски услуги, регионална политика, животна средина и климатски промени, како и надворешна, безбедносна и одбранбена политика.

Во тој период, клучните поглавја 23 и 24, кои вклучуваат правда и основни човекови права, како и правда, слобода и безбедност, треба да се затворат.

Црна Гора ги отвори овие поглавја уште во 2013 година, а тие се од особено значење бидејќи го одредуваат целокупното темпо на преговорите за пристапување.