Најмалку 11 повредени откако силни морски пијавици ја погодија Сицилија

Единаесет лица се повредени откако силни бури денеска го погодија италијанскиот остров Сицилија, при што две морски пијавици предизвикаа големи штети во пристанишниот град Марсала, соопштија властите.

Моќните ветрови оштетија згради, автомобили, училиште и земјоделско земјиште, соопшти противпожарната служба.

Градоначалничката на Марсала, Андреана Пати, ја опиша ситуацијата како сцена што наликува на „слика по војна, со уништени куќи и автомобили исфрлени од патот“.

Властите соопштија дека едно возило било исфрлено од патот во бездна. Двајцата патници биле повредени и пренесени во болница.

Локалните медиуми, повикувајќи се на болниците, јавија дека 11 лица биле повредени од силните ветрови и остатоци кои летале во воздух, вклучително и парчиња стакло, во областа Марсала во западна Сицилија.

Други делови од Италија исто така беа погодени од невреме во последните часови.

На туристичкиот остров Искија во Неаполскиот Залив, поплавите и помалите одрони предизвикаа итни интервенции на пожарникарите.

Обилни врнежи од дожд го зафатија и Неапол и околната провинција, додека главниот град Рим регистрира значителни врнежи во текот на ноќта