„NAZA“, документарниот филм за војната во Газа, на врвот на италијанските кинолисти

„По првите два дена од прикажувањето, документарниот филм за војната во Газа „NAZA“ го зазеде првото место на италијанските кинолисти, по што вкупната продажба на билети до вторникот достигна речиси 1,1 милион евра (1,24 милиони долари)“, соопшти вчера италијанската служба за следење на посетеноста на кината „Cinetel“.

Филмот во понеделникот го достигна првото место, со заработка од 451.872 евра (60.467 продадени билети), односно двојно повеќе од филмот „Avengers: Endgame“, по негово повторно прикажување тој ден.Со дополнителни 623.164 евра заработка и над 83.000 гледачи, „NAZA“ продолжи да е на прво место, со вкупна заработка од 1.096.816 евра, односно 146.720 продадени билети.

Документарецот првично бил најавен како тридневен кинонастан, од 28 до 30 септември, во 515 кина низ Италија, но поради голема заинтересираност, филмот продолжува да се емитува и по предвидениот термин.Филмот бил тајно сниман во текот на три години на покриви на згради во Тел Авив, со сведоштва на 24 припадници на израелската армија и разузнавачките служби. Нивните идентитети, гласови и изглед биле дигитално изменети со цел да се заштити нивната приватност.

Филмот, во режија на Јувал Абрахам и Рејчел Сор, добитници на Оскар, го истражува убивањето на палестински цивили во Газа преку сведоштва на припадници на израелската армија и разузнавачките служби. Тие користеле системи што се користат за идентификување, следење и напаѓање цели, и покрај очекуваните цивилни жртви. Некои од нив изјавиле дека биле сведоци на палење станбени подрачја кои служеле како засолништа, како и на убивање Палестинци за време на делењето храна во Газа.

Тој го носи името според кратенката „NAZA“, која израелската воена разузнавачка служба Аман ја користи за означување на бројот на цивили за кои се очекува да загинат во воздушен напад. Освен големата заинтересираност од публиката, филмот ја освои и специјалната награда од жирито на Меѓународниот филмски фестивал во Венеција.

Од друга страна пак, документарецот предизвика негативни реакции кај израелските официјални лица.

– Ќе предложам закон со кој ќе бидат казнети оние што ќе ги клеветат израелските војници, изјави премиерот на Израел, Бенјамин Нетанјаху, веднаш по најавата за прикажување на филмот.