Хрватска: На Брач избувна голем пожар, исклучена е струјата, на терен се десетици пожарникари

Голем пожар избувна доцна синоќа на хрватскиот остров Брач, на потегот меѓу населените места Ложишќа и Драчевица, каде што 40 пожарникари со 13 возила се борат со огнената стихија. Поради пожарот е исклучен локалниот далновод, а локалниот пат е затворен за сообраќај.

Од Противпожарниот центар Брач соопштија дека гаснењето е сериозно отежнато поради промените во правецот на ветерот, поради што пожарникарите мораат постојано да ги прераспоредуваат возилата и екипите на теренот.

– На терен се 40 пожарникари и 13 возила, кои сме принудени да ги прераспоредуваме на повеќе места бидејќи ветерот го менува правецот на дување, па така се менува и правецот на ширење на огнениот пламен – изјавија за Хина од Противпожарниот центар.

Оттаму истакнаа дека станува збор за голем пожар на ненаселен и непристапен терен и дека, според првичните информации, куќите засега не се загрозени.

Пожарникарите успеаја да ги одбранат Ложишќа, а во текот на ноќта, околу четири часот наутро, продолжи борбата со огнот на подрачјето на Бобовишќа. Поради безбедност, полицијата веднаш го затвори за сообраќај локалниот пат во тој регион.