Партијата Ликуд потврди: Бенјамин Нетанјаху повторно ќе се кандидира за премиер на Израел

Актуелниот израелски премиер Бенјамин Нетанјаху годинава повторно ќе се кандидира за реизбор, соопшти денеска неговата десничарска партија Ликуд, реагирајќи на претходната изјава на американскиот претседател Доналд Трамп кој изрази сомнеж за политичката иднина на израелскиот лидер.

Во краткото соопштение од Ликуд се наведува дека Нетанјаху ќе учествува на претстојните избори и дека, „со Божја помош, ќе победи“. Иако изборите сè уште не се официјално распишани, тие според законските рокови мора да се одржат најдоцна до октомври годинава.

Реакцијата на партијата уследи откако главниот дописник на телевизијата Еј-Би-Си (ABC) од Вашингтон, Џонатан Карл, на социјалната мрежа Икс објави дел од разговор со Трамп, во кој американскиот претседател вели дека не знае дали Нетанјаху повторно ќе влезе во изборна трка. „Не знам, тој имаше неверојатна кариера. Дали воопшто тој сака да продолжи?“, гласела изјавата на Трамп што ја пренесе новинарот.

Претстојните избори ќе бидат први во Израел по нападот на Хамас од 7 октомври 2023 година, кој се смета за најголем безбедносен неуспех во историјата на земјата и кој го покрена израелскиот напад врз Појасот Газа. Нетанјаху се соочува со исклучително бурен мандат откако се врати на власт во декември 2022 година на чело на најдесничарската коалиција во историјата на земјата, следена со масовни антивладини протести уште пред избувнувањето на војните во Газа, Либан и Иран.

Јавните анкети во земјата постојано покажуваат дека неговата коалиција тешко би го освоила неопходното мнозинство на следните избори. Истражувањето на Израелскиот институт за демократија од Ерусалим, објавено на 9 јуни, открива дека 61 отсто од израелската јавност смета дека тој воопшто не треба да се кандидира. Сепак, анкетите исто така укажуваат дека ниту потенцијалната коалиција на опозициските партии не би имала доволно парламентарно мнозинство, освен ако не коалицира со арапските партии, опција што дел од опозициските лидери веќе категорично ја отфрлија.

Американските и израелските претставници наведуваат дека Трамп и Нетанјаху, кои заедно ја покренаа војната против Иран во февруари, сè уште одржуваат блиски односи, иако тие беа повремено затегнати во последните недели. Ова особено се однесува на барањето на Трамп до Израел да ги ограничи воените акции во Либан, додека Вашингтон преговара за мировен договор со Техеран.

Минатата недела Трамп призна дека во еден жесток телефонски разговор го нарекол Нетанјаху „проклет лудак“, но додаде дека генерално добро се согласуваат, притоа повторно упатувајќи апел до израелскиот претседател да го помилува Нетанјаху за обвиненијата за корупција кои актуелниот премиер ги негира.