Во Шпанија почнува предизборната кампања за предвремените парламентарни избори на 29 ноември

Во Шпанија денеска почнува предизборната кампања за предвремените парламентарни избори закажани за 29 ноември, со првите митинзи на социјалистичкиот премиер Педро Санчез и на неговиот ривал од Народната партија, Алберто Нуњез Феихо, во услови на силни општествени тензии откако во земјата избувнаа масовни протести поради станбената криза.

Во обид да одговори на незадоволството, владата на Санчез поднесе во парламентот два законски предлога за домувањето, кои беа отфрлени, што го наведе премиерот да распише предвремени парламентарни избори, чиј исход останува неизвесен.
Покрај прашањето за Сеута, се очекува токму станбената криза и, пошироко, трошоците за живот, кои се меѓу главните грижи на шпанските граѓани, да доминираат во првите обраќања на двајцата лидери.

Во неколку градови во земјата, особено во центарот на Мадрид, активисти и демонстранти продолжуваат да одржуваат шатори и импровизирани кампови, барајќи подобра заштита на станарите. Во обид да влијаат врз јавната дебата, најголемите шпански синдикати повикаа на генерален штрајк на 11 ноември, што ќе биде прв штрајк од ваков вид од 2012 година.

Санчез, кој е на власт веќе осум години, ја започнува својата прва предизборна посета во Андалузија. Симболично, тој се враќа во предградието на Севиља, каде што ја започна кампањата и во 2023 година. Тогаш, и покрај неповолните прогнози, успеа да ја задржи власта по впечатливиот политички камбек. Токму во ова упориште на шпанските социјалисти Санчез го започна своето политичко враќање по оставката од лидерската функција во Шпанската социјалистичка работничка партија во 2016 година.

– На Шпанија ѝ е потребен поголем социјален напредок и помалку навреди од десницата – изјави Санчез, најавувајќи ја насоката на својата кампања. Тој планира да стави акцент врз социјалните придобивки, особено врз „забраната на принудните иселувања од домовите“.

Лидерот на главната опозициска сила, Народната партија, Алберто Нуњез Феихо, во исто време ќе зборува во Мадрид. Се очекува конзервативниот политичар повторно да го критикува Санчез за неговиот пристап кон мигрантската криза во Сеута. Феихо пред неколку дена ја посети шпанската ексклава и вети враќање кон „нормалноста“ доколку дојде на власт.

На крајот на јули, повеќе од 70.000 мигранти влегоа во Сеута, пред огромното мнозинство од нив да се врати во Мароко. Сеута е „симбол на пропаста, корупцијата и нечесноста во кои потона земјата“ под власта на Санчез, изјави Феихо при посетата, повикувајќи на „длабоки промени“ во Шпанија.

На изборите право на глас имаат речиси 39 милиони Шпанци. Анкетите ѝ даваат предност на Народната партија пред социјалистите, но не и апсолутно мнозинство. Во такво сценарио, крајнодесничарската партија „Вокс“, третата најголема политичка сила во земјата, која бележи раст во анкетите, би можела да стане решавачки фактор во формирањето на идната влада.