Судот во Ница ја поништи забраната за буркини во одморалиштето Манделе-ла-Напул

Суд во Ница минатата недела ја поништи забраната за буркини на плажата во одморалиштето Манделе-ла-Напул на Азурниот Брег.

Според пресудата, донесена на 11 септември, забраната за костими за капење што го покриваат целото тело, што го носат дел од муслиманките, грубо и незаконски ги крши трите основни слободи: слободата на движење, слободата на совеста и личната слобода.

Забраната од општината беше донесена со образложение дека жените кои носат како буркини, јасно ја изразуваат верска припадност, што претставува закана за јавниот ред.

Судиите наведоа дека не се доставени докази за нарушување на јавниот ред и буркините не претставуваат ризик за безбедноста на посетителите на плажа и пливачите.

Иако Државниот совет, највисокиот административен суд во Франција, ја поништи забраната за буркини на плажите пред години, некои крајбрежни градови сепак го поддржаа мораториумот во текот на летото.

Манделе-ла-Напул во 2012 година стана првото крајбрежно одморалиште што воведе забрана. И покрај одлуката на Државниот совет, конзервативниот градоначалник на градот постојано ја обновува мерката.

Франција е секуларна земја, во која постои строга поделба на црквата и државата. Прашањето за религиозните симболи на јавните простори е постојан извор на контроверзии, особено поврзани со исламот.