Поскапи горива од полноќ

Од полноќ стапуваат на сила нови, повисоки цени на горивата. Регулаторната комисија за енергетика денеска донесе одлука согласно која ценовниците ќе бидат повисоки за два до два и пол денари.

Еуросупер БС-95 ќе поскапи за два денари, додека малопродажните цени на ЕУРОСУПЕР БС-98 и на дизелот ќе пораснат за 2,50 денари за литар.

Дополнително, ќе се зголеми и малопродажната цена на мазутот за 0,846 денари за килограм, па неговата нова цена ќе изнесува 50,814 денари за килограм. Единствено, цената на екстра лесното масло за домаќинство ќе се намали за 0,50 денари за литар.

Според новата одлука, литар ЕУРОСУПЕР БС -95 ќе чини 87 денари, ЕУРОСУПЕР БС 98 ќе се продава за 89 денари за литар, а дизелот по цена од 92 денари за литар.

Новата цена на екстра лесно масло за домаќинство ќе биде 93,50 денари за литар. Вкупното зголемување на цените во просек изнесува 1,84% во споредба со претходната одлука од минатиот понеделник.

Владата, на специјална седница одржана во саботата, донесе решение мерките за ублажување на последиците од кризата на Блискиот Исток да продолжат да важат до 1 јуни.