Додека Радев зборува за 200.000 Бугари во Македонија: Разочаран сум од одзивот, само 250 македонски Бугари се пријавиле да гласаат, вели Мицкоски

Премиерот Христијан Мицкоски изјави дека е благо разочаран од нискиот одѕив на македонските Бугари за учество на претстојните избори, посочувајќи дека интересот е значително помал од очекуваниот.

– Благо сум разочаран поради нискиот одѕив на македонските Бугари, бидејќи само 250 македонски Бугари се заинтересирани да учествуваат на овие избори од оние, според Румен Радев и луѓето околу него, 200 илјади. Очекував излезеноста да биде малку поголема – рече Мицкоски.

Тој потенцираше дека бројките кои досега беа споменувани во јавноста, а кои се однесуваат на бројот на македонски Бугари, очигледно не кореспондираат со реалниот интерес за учество во изборниот процес.

Според премиерот, ваквиот одѕив отвора прашања за реалната бројка на граѓани кои се идентификуваат како македонски Бугари, но и за тоа колку тие навистина се мотивирани активно да учествуваат во политичките процеси.

Воедно, тој додаде дека институциите ќе продолжат да обезбедуваат услови за фер и демократски изборен процес за сите граѓани, без разлика на нивната етничка припадност, нагласувајќи дека секој има право да учествува и да го искористи своето гласачко право.

Изјавата на Мицкоски доаѓа во период кога прашањата поврзани со идентитетот, правата на заедниците и изборниот процес се во фокусот на јавноста, особено во контекст на односите меѓу Македонија и Бугарија.