Производителот на храна за бебиња „HiPP“ соопшти дека е цел на обид за изнуда

Производителот на храна за бебиња „HiPP“ соопшти дека е цел на обид за изнуда, откако во Австрија беше пронајдена тегла со детска храна контаминирана со отров за стаорци.

„HiPP е жртва на изнуда“, се вели во соопштението на семејната компанија.

Тегла од 190 грама со каша од морков и компир на „HiPP“, контаминирана со отров за стаорци, беше запленета во австрискиот регион Бургенланд во текот на викендот. Се верува дека во оптек во регионот биле пуштени најмалку две тегли, при што по едната сè уште итно се трага.

Полицијата во баварскиот град Инголштад соопшти дека пет манипулирани тегли со храна за бебиња се пронајдени во Австрија, Чешка и Словачка, пренесе ДПА.

Од „HiPP“ наведоа дека изнудувачот испратил порака до заедничко електронско сандаче на групата, кое според стандардните процедури се проверува само во подолги интервали. Компанијата соопшти дека веднаш ги информирала полицијата и властите откако дознала за случајот и формирала внатрешен кризен тим. Ниту полицијата, ниту компанијата не открија што бара наводниот изнудувач.

Австриските обвинители соопштија дека истражуваат под сомнение за намерно загрозување на јавноста. Прелиминарниот токсиколошки извештај открил отров за стаорци во тегла пронајдена во Австрија, а со дополнителни тестови ќе се утврди дозата и потенцијалната опасност доколку се конзумира.

„HiPP“ нагласи дека инцидентот на ниту еден начин не е поврзан со квалитетот на производот или производството, опишувајќи го како „надворешно криминално мешање“.

Портпаролот на „HiPP“, Клеменс Прејсинг, потврди за ДПА дека контаминирани тегли се пронајдени и во Чешка и Словачка. Трговските партнери во тие земји ги повлекоа сите тегли на „HiPP“ од продажба како мерка на претпазливост, додаде тој.

„HiPP“, семејна компанија, е основана пред повеќе од 120 години во Баварија, Германија. Денес, нејзиното седиште е во Закселн, во швајцарскиот регион Обвалден.