Шојгу: Развојот на дронови во Украина значи дека ниеден регион не може да се чувствува безбедно

Висок руски функционер денеска предупреди дека темпото и развојот на производството на дронови во Украина значи дека ниеден руски регион не е безбеден од напад.

Сергеј Шојгу, секретар на моќниот Совет за безбедност на Русија и поранешен руски министер за одбрана, на состанок на функционери во уралскиот град Екатеринбург изјави дека бројот на украински саботажи во Русија се зголемил за 40 отсто во 2025 година, на 1.830 случаи.

„…Темпото на развој на системи за оружје, првенствено беспилотни системи со дронови, и софистицираноста на методите што се користат за нивно распоредување се такви што ниеден регион во Русија не може да се чувствува безбедно“, изјави Шојгу.

Градоначалникот на Москва вчера објави дека системите за воздушна одбрана го спречиле најголемиот напад врз руската престолнина за најмалку една година соборувајќи 250 украински дрона во текот на викендот.

Руското Министерство за одбрана денеска објави дека во последните 24 часа се соборени 421 украински дрон.

Русија бомбардира украински цели со артилерија, беспилотни летала и воздушни напади, а Украина нападна длабоко во Русија со саботажни групи и дронови убивајќи руски генерали и напаѓајќи рафинерии за нафта и цевководи.