Русија објави локално примирје поради поправки во близина на нуклеарната централа „Запорожје“

Локално примирје стапи во сила денеска во областа на нуклеарната централа „Запорожје“ во југоисточна Украина. Идејата за примирјето е да се дозволат поправки на далноводите, изјавија руски претставници.

Централата е под руска контрола од почетокот на војната. Моментно таа не произведува електрична енергија и се потпира на надворешни извори на енергија за да го одржува своето нуклеарно гориво ладно и да спречи сериозен инцидент.

Локален режим на прекин на огнот стапи во сила утрово во 7 часот по московско време во областа на нуклеарната централа „Запорожје“ во Украина, изјави генералниот директор на корпорацијата „Росатом“, Алексеј Лихачев.

Според него, локалното примирје ќе им овозможи на тимовите, меѓу кои има и специјалисти од „Росатом“, да ги поправат далноводите до централата, кои беа оштетени во гранатирањето на 10 февруари, за што тој ја обвини украинската армија.

Шефот на „Росатом“ прецизира дека поправките ќе траат најмалку една недела.

Русија и Украина постојано се обвинуваат меѓусебно за загрозување на безбедноста на објектот поради воени дејства во негова близина.