Министерството за правда на САД поднесе тужба за преземање на танкери и нафта од Венецуела

Министерството за правда на САД поднесе тужба за законско стекнување на сопственост над санкционираниот нафтен танкер „Скипер“ и речиси два милиони барели сурова нафта запленети во декември минатата година во близина на брегот на Венецуела.

САД ја поднесоа првата тужба со која се почнува правен процес за формално преземање на еден од најмалку 10-те нафтени танкери пресретнати од американските власти од крајот на минатата година.

САД ја обвинуваат Венецуела дека користи флота во сенка, составена од лажно регистрирани бродови, за шверцување нафта во глобалните синџири на снабдување. Тужбата чека одобрение од федерален судија во Вашингтон, по што САД би можеле законски да го преземат танкерот „Скипер“ и да ја продадат нафтата.

Во соопштението на Министерството за правда на САД, се наведува дека танкерот транспортирал нафта од Иран и Венецуела низ целиот свет користејќи лажни знамиња и други тактики за да ги прикрие своите активности, а приходите одат во корист на Иранската револуционерна гарда, која за САД е терористичка организација.