Пратеничката група на ВМРО-ДПМНЕ ги отфрла тврдењата на Трендафилов изнесени за пратеничката Стојаноска

 Наместо да се скрие од срамот пред македонскиот работник, Слободан Трендафилов избра со невидена дрскост, паника и нервоза да ја напаѓа пратеничката Дафина Стојаноска глумејќи жртва за да го прикрие сопствениот скандал. Ова не е напад врз семејство, ова е очајнички крик на еден „синдикалец“, кој мисли дека со солзи и етикетирања ќе го избрише фактот дека ги троши парите на работниците за личен луксуз, се наведува во соопштението од пратеничката група на ВМРО-ДПМНЕ, што МИА го пренесува интегрално.

Пратеничката група на ВМРО-ДПМНЕ најостро ги демантира и отфрла неговите очајни обиди за дефокусирање од вистината.

Правосудните органи веќе имаат чист случај пред себе, во кој Трендафилов веќе требаше да дава исказ пред надлежните органи и да сноси одговорност за злоупотреба на службеното возило за приватни цели. Додека лицемерно ги повикуваше пратениците да одат пеш, тој истиот ден се појави на протест со службеното возило, а јавноста веќе виде како истото возило се користи за семејни потреби како да е негова приватна сопственост.

Јавно го повикуваме Јавното обвинителство веднаш да отвори постапка и да истражи како се користело службеното возило во ССМ од денот на неговото назначување до денес. Дали во правилникот на ССМ пишува дека претседателот смее да го користи имотот на работниците како своја приватна сопственост за приватни потреби со гориво наполнето токму од парите на работниците?

Трендафилов залудно бара виновници кај пратениците. Спорната снимка е преземена од социјалните мрежи и е веќе јавно достапна. Најверојатно е снимена од револтиран работник или член на ССМ, на кој му е преку глава од вакви „заштитници“ на работничките права.

Трендафилов е фатен жив во сопствената лага и сега му е виновна ВМРО-ДПМНЕ за неговата неспособност. Јасно е дека неговата главна мисија не е платата на работникот, туку зачувување на сопствената фотелја и привилегиите, кои очигледно не сака да ги пушти. Народот многу бргу ќе се увери во вистинското лице на овој човек, чија уста е полна со патните трошоци на пратениците, а рацете му се длабоко во џебот на работникот. Ова видео не е напад, туку огледало во кое Трендафилов не може да се погледне бидејќи во него гледа функционер што треба веднаш да си замине и да сноси кривична одговорност.

Слободан Трендафилов ќе остане запаметен како „синдикалец“ што нема склопено ниеден договор корисен за македонскиот работник во текот на целиот мандат.

На крајот, нападот врз нашата колешка Дафина Стојаноска е само доказ за немоќта на еден функционер што го изгубил компасот. Кога немате аргументи, се служите со навреди и етикетирања.

Упатуваме силна порака дека времето на манипулации заврши. Трендафилов треба веднаш да си поднесе оставка и наместо да глуми жртва во медиумите, да подготви одбрана пред истражните органи за своето расипништво.