Денеска и утре верниците се поклонуваат пред моштите на Свети Василиј во Струмица

Денеска и утре православните верници се поклонуваат пред моштите на Свети Василиј Велики. Во манастирската црква „Свети петнаесет Тивериополски свештеномаченици“ во Струмица, во чест на големиот празник Обрезание Господово и Свети Василиј Велики, се изложени на поклонение дел од моштите на овој светец.

Од Струмичката епархија на МПЦ-ОА информира дека заради тековните градежно-реконструктивни активности во храмот „Свети Кирил и Методиј“ во Струмица, годинава чествувањата во спомен на Свети Василиј Велики ќе бидат служени во манастирот на „Светите петнаесет Тивериополски свештеномаченици“.

Оттаму додаваат дека ќе се одржат две богослужби-Празнична вечерна служба денеска и утре Света Божествена Литургија.

Инаку, за православната црква Свети Василиј Велики е еден од нејзините столбови или како што бил наречен „око на православната црква и уста на Светиот Дух“.

Според преданијата, моштите се донесени во Струмица во 1830 година од Кападохија од војник од овие краишта кој служел во војската на Турската империја.