Британската кралица Камила: Застрашувачки е да се загребе под површината на насилството врз жените

Британската кралица Камила изјави дека смета оти е „застрашувачки“ да се „загребе под површината“ на размерите на насилството врз жените и девојчињата ширум светот.

За време на Женскиот форум и прием на Комонвелтот во Антигва, таа ги повика активистите кои работат на запирање на физичкото и сексуалното насилство врз жените „едноставно да продолжат понатаму“, додавајќи: „Ви благодарам многу“.

Во својот говор пред делегатите на Средбата на шефови на влади на Комонвелтот (CHOGM), таа истакна дека светот мора да ги слуша жените кога бараат помош и порача дека постои „верба“ оти ерата на насилство врз жените може да заврши.

На малиот прием во градината што следуваше потоа, во разговор со преживеани лица и жени кои работат во овој сектор, таа во врска со злоупотребата изјави: „Се обидувам да ги поттикнам луѓето да зборуваат повеќе за тоа, за да престане да биде табу“.

– Кога ќе почнете да гребете под површината, застрашувачки е – рече таа во разговор со Тамара Хагинс од Организацијата на цивилното општество.

Во своето воведно обраќање, кралицата зборуваше за важноста од активна поддршка на жените кога бараат помош, како и за напредокот на кој била сведок за време на нејзините кралски турнеи ширум светот.

Камила ја постави превенцијата од физичко и сексуално насилство врз жените и девојчињата како едно од нејзините клучни прашања во јавното дејствување.

– Сите ние познаваме некого кој бил лично погоден од овие гнасни злосторства. Затоа, сите ние мора да бидеме дел од решението – истакна таа.